Hannaanka xulashada Agaasimaha Guud ee Ururka Ganacsiga Addunka WTO ayaa galay wareeggii ugu dambeeyay. Toddobaadkii dhawaa ayaa jagada oo ay u taagnayeen shan waddan la sheegay inay isku soo hareen labo musharrax oo ka kala socda Konfurta Kuuriya iyo Nigeria.
Waxaa wareegga labaad ku haray musharraxiinta kala ah Amina Maxamed (Kenya), Maxammed Maziad Al-Tuwaijri (Sacuudiga) iyo Liam Fox (Britain), kuwaas oo aan helin taageero ku filan. Waxaa hubaal ah in madaxa ugu sarreeya hay’adda ay noqon doonto haween markii ugu horreysay taariikhda hay’adda.
Afhayeenka WTO oo la hadlayay warbaahinta ayaa sheegay in “labada hablood oo isku soo haray ay yihiin kuwii laysku raacay inay u qalmaan hoggaaminta hay’adda.” Agaasimihii Guud ee hay’adda oo u dhashay Brasiil Roberto Azevedo ayaa si lama filaan ah u banneeyay jagada kaddib markii uu iskiis isaga tagay August 31, 2020 oo ahayd sanad ka hor dhammaadka xilhayntiisii.
Si kastaba ha ahaate, Afrika ayaa u muuqataa inay dhexdhexaad ka tahay xiisadaha ganacsiga ee u dhexeysa Shiinaha iyo Mareykanka. Balse xiriirka Japan ay la leedahay Koonfurta Kuuriya ayaa tijaabo ku jiro, iyadoo Shiinaha uu u janjeero musharraxa Nigeria.
Marwo Ngozi Okonjo-Iweala oo ah dhaqaale-yahan wax ku soo baratay dalka Mareykanka ayaa u muuqato in cidna ku haysan jagada hoggaanka haddii Nigeria ay si wanaagsan u ciyaarto turubka si musharraxeedu uga nabadgasho Shiinaha iyo Mareykanka.
Wareegga saddexaad ee ah midka ugu dambeyo waxuu bilaabanayaa dhammaadka bishaan waxuuna socon doonaa ilaa Nofeember 6da. Musharraxa laysku raaco oo ku guuleysta tartanka waxaa la filayaa in lagu dhawaaqi doono ugu Nofeembar 7da.
Cabdulqaadir Cariif Qaasim
AFEEF: Fikradaha lagu dhiibto bartaan waa kuwa qoraaga u gaar ah, oo aan matalin kuwa wargayska, guddiga tifaftirka ama shaqaalaha.
Maqaalka waxaa laga yaabaa inuusan u qorneyn qaabkiisii ugu dambeyay oo waa la cusbooneysiin karaa ama dib loo eegi karaa mustaqbalka. Masawirka: Internetka ayaa laga soo amaahsaday.
